មកដឹងតម្លៃសំបុត្រចូលទស្សនាការប្រកួតពានរង្វាន់ AFF U23 Championship 2022
រាជធានីភ្នំពេញ ៖ ការប្រកួតបាល់ទាត់ពានរង្វាន់ AFF U23 Championship 2022 ដែលកម្ពុជាទទួលធ្វើជាម្ចាស់ នឹងត្រូវចាប់ផ្ដើមធ្វើពីថ្ងៃទី១៤ កុម្ភៈ ឆ្នាំ២០២២ ខាងមុខនេះហើយនៅទីលានពហុកីឡដ្ឋានជាតិមរតកតេជោ ។ ទោះបីសំបុត្រចូលទស្សនានៅមិនទាន់ដាក់លក់ជាផ្លូវការក្ដី ក៏តម្លៃសំបុត្រត្រូវបានប្រកាសឱ្យដឹងដែរ។
យោងតាមផេកសហព័ន្ធកីឡាបាល់ទាត់កម្ពុជាចេញផ្សាយកាលពីពេលថ្មីៗនេះ សំបុត្រចូលទស្សនាការប្រកួតកីឡាបាល់ទាត់ពានរង្វាន់AFF U23 Championship នឹងត្រូវដាក់លក់ជាផ្លូវការនៅថ្ងៃទី១០ កុម្ភៈ នេះហើយ ។ តម្លៃសំបុត្រត្រូវបានបែងចែកជា៤ប្រភេទរួមមាន៖ ប្រភេទទី១តម្លៃ៣០.០០០រៀលមានចំនួន៦.៧៨៩កៅអី, ប្រភេទទី២មានតម្លៃ២០.០០០រៀលមានចំនួន៣.០២៩កៅអី, ប្រភេទទី៣មានតម្លៃ១៤.០០០រៀលមានចំនួន៩.៧៧៣កៅអី និងប្រភេទទី៤មានតម្លៃ៨.០០០រៀលមានចំនួន៦.៨៤៨កៅអី ។
តាមការឱ្យដឹងបន្ថែម ចំពោះចំនួនកៅអីដែលសហព័ន្ធបានកំណត់នេះគឺត្រូវបានកាត់ចេញអស់ចំនួន៥០% បានន័យថា ចំនួនទស្សនិកជនចូលទស្សនា អនុញ្ញាតបានត្រឹមតែ៥០%នៃចំនួនសរុបប៉ុណ្ណោះ។ នៅមានលក្ខខណ្ឌជាច្រើនទៀតដែលសហព័ន្ធនឹងជម្រាបជូននៅពេលក្រោយ។
ទន្ទឹមគ្នានេះដែរ សហព័ន្ធកីឡាបាល់ទាត់កម្ពុជាក៏បានចេញកម្មវិធីប្រកួតរួចហើយសម្រាប់ពូលAដែលកម្ពុជាទទួលធ្វើជាម្ចាស់ផ្ទះដូចខាងក្រោម៖
-ថ្ងៃទី១៤ កុម្ភៈ ក្រុមជម្រើសជាតិកម្ពុជាត្រូវជួបជាមួយក្រុមជម្រើសជាតិព្រុយណេ នាវេលាម៉ោង៧យប់នៅពហុកីឡដ្ឋានជាតិមរតកតេជោ។
-ថ្ងៃទី១៧ កុម្ភៈ ក្រុមជម្រើសជាតិកម្ពុជាជួបជាមួយក្រុមជម្រើសជាតិហ្វីលីពីននាវេលាម៉ោង៧យប់នៅពហុកីឡដ្ឋានជាតិមរតកតេជោ និងថ្ងៃទី២០ កុម្ភៈ ក្រុមជម្រើសជាតិកម្ពុជាត្រូវជួបជាមួយក្រុមជម្រើសជាតិទីម័រខាងកើតនាវេលាម៉ោង៧យប់នៅពហុកីឡដ្ឋានជាតិមរតកតេជោដូចគ្នា។
គួរបញ្ជាក់ថា AFF U23 Championship 2022 ត្រូវបានបែងចែកជា៣ពូលគឺ៖
-ពូលA មានកម្ពុជា ព្រុយណេ ហ្វ៊ីលីពីន និងទីម័រខាងកើត
-ពូលB មានឥណ្ឌូណេស៊ី ម៉ាឡេស៊ី មីយ៉ាន់ម៉ានិងឡាវ និង
-ពូលC មានថៃ វៀតណាម និងសិង្ហបូរី៕
- Tags :
- Cambodia