កម្ពុជា សម្រេចប្រសិទ្ធនាមឈ្មោះផ្លូវពីរខ្សែទៅជាឈ្មោះរបស់អតីតមេដឹកនាំប្រទេសឥណ្ឌូនេស៊ី
កម្ពុជាតាមរយៈសម្ដេចនាយក រដ្ឋមន្ត្រី ហ៊ុន សែន បានសម្រេចប្រសិទ្ធនាមឈ្មោះផ្លូវចំនួនពីរខ្សែ ទៅជាឈ្មោះ អតីតថ្នាក់ដឹកនាំ របស់ប្រទេសឥណ្ឌូនេស៊ីដើម្បីតបស្នងដែលថ្នាក់ដឹកនាំប្រទេសឥណ្ឌូនេស៊ី បានចូលរួមចំណែកផ្សះផ្សាជាតិកម្ពុជា រហូតធ្វើឱ្យមានសន្តិភាពដល់សព្វថ្ងៃ ។
ក្នុងជំនួបសម្តែងគួរសម រវាងឯកឧត្តម ឃួង ស្រេង អភិបាលរាជធានីភ្នំពេញ និងលោក ស៊ូឌី ម៉ានហាសេង (Sudirman Haseng ) ឯកអគ្គរដ្ឋទូត ឥណ្ឌូនេស៊ី នៅសាលា រាជធានីភ្នំពេញ កាលពីថ្ងៃអង្គារ ឯកឧត្តមឃួង ស្រេងបានរម្លឹកពីភាពអស្ចារ្យរបស់ អតីតថ្នាក់ដឹកនាំឥណ្ឌូនេស៊ី ដែលបានចូលរួមចំណែកយ៉ាងសំខាន់ ដើម្បីផ្សះផ្សាជាតិ កម្ពុជារហូតធ្វើឱ្យកម្ពុជា គឺមានសន្តិភាពពេញលេញរហូតមកដល់សព្វថ្ងៃនេះ ។
អភិបាល រាជធានីភ្នំពេញ ប្រាប់អគ្គរាជទូតប្រទេសឥណ្ឌូនេស៊ី ឱ្យដឹងថា សម្ដេចនាយករដ្ឋមន្ត្រី ហ៊ុន សែន បានឱ្យរដ្ឋបាលរាជធានីភ្នំពេញ ចាប់ផ្ដើមកសាងផ្លូវចំនួន ២ខ្សែ ដែលត្រូវតភ្ជាប់ពីផ្លូវជាតិលេខ ៦ ឆ្ពោះទៅមហាវិថីឈ្នះឈ្នះ ស្ថិតក្នុងខណ្ឌជ្រោយចង្វារ ដើម្បី រំដោះចរាចរខណៈពេលកម្ពុជា នឹងត្រូវធ្វើជាម្ចាស់ផ្ទះនៃការ ប្រកួត កីឡា ស៊ីហ្គេមលើកទី ៣២ និងប៉ារ៉ាហ្គេមលើកទី ១២ នា ខែ ឧសភា ឆ្នាំ ២ ០ ២ ៣ ខាងមុខ ។
ឯកឧត្តម ឃួង ស្រេងបញ្ជាក់ថាចំពោះផ្លូវចំនួន២ខ្សែ ដែលតភ្ជាប់ពីផ្លូវជាតិ លេខ៦ឆ្ពោះទៅ មហាវិថី ឈ្នះឈ្នះ នឹងត្រូវ ប្រសិទនាមថា វិថីស៊ូកាណូ (Jalan Soekar no ) និង ផ្លូវមួយខ្សែទៀត នឹងដាក់ឈ្មោះថាវិថីអាលីអាឡាតាស់ (Jalan Ali A latas ) ។
ឯកឧត្តម និយាយ ថា ៖ « ការដាក់ឈ្មោះផ្លូវពីរខ្សែ ទៅជាឈ្មោះអតីត ថ្នាក់ដឹកនាំប្រទេស ឥណ្ឌូនេស៊ី គឺធ្វើឡើង ដើម្បីតបស្នងប្រទេសឥណ្ឌូនេស៊ី ដែលរួមចំណែកផ្សះផ្សាជាតិ របស់កម្ពុជារហូតធ្វើឱ្យកម្ពុជាមានសន្តិភាពពេញលេញដល់សព្វថ្ងៃនេះ »៕
