រដូវត្រីធ្វើប្រហុកផ្អកចាប់ផ្ដើមជាមួយការអំពាវនាវឱ្យពលរដ្ឋមកទិញត្រីប្រហុកផ្អក
រដូវកាលត្រីប្រហុក ផ្អក និងត្រីឆ្អើរបានមកដល់ហើយនៅក្នុងឆ្នាំនេះ។ វាជារដូវកាសដែលប្រជានេសាទតាមដងទន្លេសាបត្រូវបានអនុញ្ញាត ខណៈពលរដ្ឋផ្សេងទៀតបានសម្រុកទិញត្រីទាំងនោះពីប្រជានេសាទ ដើម្បីធ្វើប្រហុក ផ្អក និងត្រីឆ្អើរសម្រាប់ទំនុកបម្រុងបរិភោគប្រចាំឆ្នាំ។
ប្រហុក ផ្អក និងត្រីឆ្អើរ គឺជាប្រភេទអាហារផ្អាប់ដ៏ពេញនិយមក្នុងការទទួលទានសម្រាប់ប្រជាពលរដ្ឋកម្ពុជា។ ក្នុងនោះប្រហុកក៏ជាគ្រឿងផ្សំមួយក្នុងអាហារជាច្រើនមុខផ្សេងទៀតរបស់ប្រជាជនកម្ពុជាផងដែរ។
សម្រាប់ឆ្នាំនេះ លោក ងិន ឌី នាយខណ្ឌរដ្ឋបាលជលផលក្រុងភ្នំពេញ បានប្រាប់ខ្មែរថាមស៍ពីម្សិលមិញថា រដូវត្រីធ្វើប្រហុក ផ្អក និងត្រីឆ្អើរ បានចាប់ផ្ដើមមានចំនួនកើនឡើងជាមួយនឹងការនេសាទម្ដងបានត្រីពី ១០០ ទៅ ១៥០ គីឡូក្រាមនៅគន្លងដាយតាមដងទន្លេសាបភាគខាងលើ និងនៅផ្នែកខាងក្រោមគេនេសាទម្ដងបានត្រីពី ៣០ ទៅ ១០០ គីឡូក្រាម។
លោកបន្តថា ត្រីសម្រាប់ធ្វើប្រហុក ផ្អក និងត្រីឆ្អើរ កាន់តែសម្បូរច្រើនឡើងនៅពីបីថ្ងៃខាងមុខទៀតដោយសារតែកម្ពស់ទឹកទន្លេសាបក្នុងឆ្នាំនេះមានស្ថានភាពល្អ និងប្រសិនបើមេឃស្រឡះល្អ គ្មានភ្លៀងកក់ខែ ឬទទួលរងឥទ្ធិពលព្យុះ។ ដូច្នេះត្រីសម្រាប់ធ្វើប្រហុកនៅឆ្នាំនេះមានភាពល្អប្រសើរជាងឆ្នាំមុន។
លោក ងិន ឌី បាននិយាយថា ម្លៃត្រីដែលឈ្មួញកណ្ដាលទិញពីម្ចាស់ដាយមានតម្លៃចន្លោះពី ២ ០០០ ទៅ ២ ២០០រៀលក្នុងមួយគីឡូក្រាម ហើយលក់ចេញវិញ តម្លៃអាចលើសពីនេះ។ ប៉ុន្តែតម្លៃនេះអាចចុះមកវិញនូវចន្លោះពី ១ ០០០ ទៅ ៨០០រៀលក្នុងមួយគីឡូក្រាម។
លោកបញ្ជាក់ថា៖ «ត្រីសម្រាប់ធ្វើប្រហុក ផ្អក និងត្រីឆ្អើរ គឺជាប្រភេទត្រីរៀល ត្រីស្លឹកឫស្សី និងត្រីចន្ទាសភ្លុក»។
យោងលើស្ថានភាពនេះ រដ្ឋបាលជលផលក្រុងភ្នំពេញអំពាវនាវឱ្យពលរដ្ឋដែលមានបំណងធ្វើប្រហុក ផ្អក ឬត្រីឆ្អើរសម្រាប់ទុកបរិភោគប្រចាំឆ្នាំគួរប្រញាប់មកទិញត្រីឱ្យបានរួសរាន់។
លោក ម៉ូត ហូសាន់ អ្នកធ្វើអាជីវកម្មនេសាទគន្លងដាយត្រីក្នុងភូមិសាស្ត្ររាជធានីភ្នំពេញ បាននិយាយថា ត្រីសម្រាប់ធ្វើប្រហុកផ្អកចាប់ផ្តើមសម្បូរហើយ ដោយកាលពីថ្ងៃច័ន្ទរកត្រីបានចន្លោះពី ៣០ ទៅ ១០០ គីឡូក្រាមក្នុងការនេសាទម្ដង។
លោកបន្តថា ប្រភេទត្រីចាប់បាននៅជាហ្វូងត្រីនាំមុខមិនសូវមានទំហំធំទេ ហើយក៏មិនទាន់មានអ្នកមករកទិញដែរ តែប្រសិនបើមានគេមកទិញ គឺលោកលក់មួយគីឡូក្រាម ១ ០០០រៀល។
លោក អុឹង ទ្រី អនុប្រធានរដ្ឋបាលជលផលនៃក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ទិន្នផលជលផលក្នុងប្រទេសកាលពីឆ្នាំ២០២១ មានការធ្លាក់ចុះ ប៉ុន្តែក្នុងឆ្នាំ២០២២នេះ ត្រូវបានព្យាករថាអាចនឹងកើនឡើងមកវិញ។