អ្នកនេសាទប្រើឧបករណ៍ម៉ាញ់ ចាប់បាន ត្រីរាជមួយក្បាលទំងន់ ៤៦ គីឡូក្រាម មានប្រវែង ១៥៧ ស.ម ស្ថិតនៅក្នុងភូមិស្វាយអាត់ ស្រុកខ្សាច់កណ្តាល ខេត្តកណ្តាល
ខេត្តកណ្តាល៖ អ្នកនេសាទ ប្រើឧបករណ៍ម៉ាញ់ ចាប់បាន ត្រីរាជមួយក្បាលទំងន់ ៤៦ គីឡូក្រាម មានប្រវែង ១៥៧ ស.ម ស្ថិតនៅក្នុងភូមិស្វាយអាត់ ឃុំព្រែកតាមាក់ ស្រុកខ្សាច់កណ្តាល នេះបើតាមប្រភពព័ត៌មានពីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងកាលពីថ្ងៃទី ២៦ ខែធ្នូ ឆ្នាំ ២០២២។
ក្រោមកិច្ចសហការជាមួយអ្នកនេសាទ ក្រុមការងារនៃវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប និងគម្រោងអច្ឆរិយនៃទន្លេមេគង្គបានពាក់ស្លាកសញ្ញាក្នុងគោលបំណងសិក្សាតាមដានការបម្លាស់ទី ជាពិសេសលើការអភិរក្សប្រភេទត្រីកម្រនេះ។ ត្រីដែលចាប់បាននេះត្រូវបានប្រលែងចូលក្នុងទន្លេមេគង្គមេគង្គវិញ។
ត្រីរាជ ស្ថិត ក្នុងបញ្ជីក្រហម ដែលមានចំណាត់ថ្នាក់កំពុងរងការគំរាមកំហែងយ៉ាងខ្លាំងឈានទៅរកការផុតពូជ (Critical Endangered) របស់អង្គការសហភាពអន្តរជាតិ ដើម្បីការអភិរក្សធម្មជាតិ IUCN ហើយត្រីនេះត្រូវបានចុះបញ្ជីឧបសម្ព័ន្ធ១ របស់អនុសញ្ញាសាយតេស (CITES) ផងដែរ ដែលហាមដាច់ខាតការធ្វើនេសាទ ទិញលក់ និងដឹកជញ្ជូនផ្សេងៗ។
គួរជម្រាបដែរថា ប្រភេទត្រីធំៗដូចជាត្រីរាជ ត្រីគល់រាំង ត្រីប្រាធំ ពោព្រុយ និងត្រីត្រសក់ដែលជាប្រភេទត្រីជិតផុតពូជ បានចាប់ផ្តើមបម្លាស់ទីចេញពីបឹងទន្លេសាប នាចុងខែតុលារហូតដល់ខែធ្នូ ដោយឆ្លងកាត់ទន្លេសាប រួចឆ្ពោះទៅកាន់អន្លង់ជ្រៅៗតាមបណ្តោយដងទន្លេមេគង្គក្នុងខេត្តកំពង់ចាម ក្រចេះ និងស្ទឹងត្រែង។ ក្រុមការងារបានផ្សព្វផ្សាយ និងសំណូមដល់ប្រជានេសាទមេត្តាចូលរួម និងផ្តល់ព័ត៌មានដល់រដ្ឋបាលជលផលក្នុងការចូលរួមអភិរក្សប្រភេទត្រីកម្រនេះ។