ទឹកជំនន់ក្នុងខែសីហាបង្កឲ្យមនុស្ស៩នាក់ស្លាប់និងប៉ះពាល់រាប់ម៉ឺនគ្រួសារ
ទឹកជំនន់ទូទាំងប្រទេសក្នុងខែសីហាបានបង្កឲ្យមនុស្ស៩នាក់ស្លាប់ និងប៉ះពាល់ដល់ ២១.០០០ គ្រួសារ គិតជាប្រជាពលរដ្ឋចំនួន ៨៣,០០០នាក់ និងដំណាំរាប់រយហិកតាក៏ត្រូវបានបំផ្លាញផងដែរ។
ក្នុងកិច្ចប្រជុំបូកសរុបលទ្ធផលការងារគ្រប់គ្រងគ្រោះមហន្តរាយខែសីហា ឆ្នាំ២០២២ និងទិសដៅបន្តក្នុងខែកញ្ញា ឆ្នាំ២០២២ កាលពីថ្ងៃទី០២ ខែកញ្ញា លោក គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ថា ខេត្តកណ្តាល តាកែវ ស្វាយរៀង ព្រៃវែង និងរាជធានីភ្នំពេញ គឺជាខេត្តដែលរងគ្រោះដោយទឹកជំនន់ខ្លាំងជាងគេ។
លោកថា ផ្ទះចំនួន៣.២៧៤ ខ្នង សាលារៀន ១៤ កន្លែង វត្តចំនួន ៧ និងមន្ទីរពេទ្យចំនួន ២ ព្រមទាំងអគារពាណិជ្ជកម្ម និងការិយាល័យរដ្ឋបាលត្រូវបានជន់លិច។
លោកមានប្រសាសន៍ថា៖ « ក្នុងចំណោមគ្រួសារដែលរងផលប៉ះពាល់ចំនួន ២០.៩៦៤ គ្រួសារមានប្រជាពលរដ្ឋចំនួន ៨៣.៨៥៦នាក់ត្រូវបានផ្លាស់ប្តូរទីលំនៅទៅកាន់ទីជម្រកសុវត្ថិភាពបណ្តោះអាសន្ន »។
លោកបានបន្តថា៖ «មានអ្នកស្លាប់៩នាក់ ស្ត្រី៣នាក់ និងកុមារ៦នាក់ »។ នេះបើតាមលោក គន់ គីម ។ លោកថា ភ្លៀងធ្លាក់ខ្លាំងមិនត្រឹមតែមកកម្ពុជាប៉ុណ្ណោះទេ ថែមទាំងប្រទេសផ្សេងទៀតក្នុងតំបន់ផងដែរ។
លោកបន្តថា៖ «ភ្លៀងមួយផ្នែកដោយសារការប្រែប្រួលអាកាសធាតុបានប៉ះពាល់ដល់គ្រប់វិស័យ។ ទឹកទន្លេមេគង្គ និងទន្លេសាប បានហក់ឡើងលើសកម្រិតប្រុងប្រយ័ត្ន ដូចជានៅស្រុកស្រែពក រតនគិរី ស្ទឹងក្រឡាញ់ សៀមរាប និងស្ទឹងសែន ក្នុងខេត្តព្រះវិហារ និងខេត្តកំពង់ធំ »។
លោកថា គណៈកម្មធិការបានសហការជាមួយក្រសួងពាក់ព័ន្ធ និងរដ្ឋបាលថ្នាក់ក្រោមជាតិ ក្នុងការរៀបចំ និងអន្តរាគមន៍ជួយសង្គ្រោះ និងឆ្លើយតបនឹងគ្រោះមហន្តរាយ។
រដ្ឋាភិបាលក៏បានឆ្លើយតបទាន់ពេលវេលា និងស្តារឡើងវិញនូវរាល់ការខូចខាតដែលបណ្តាលមកពីទឹកជំនន់ ជាពិសេស
ហេដ្ឋារចនាសម្ព័ន្ធជនបទ និងវិស័យកសិកម្ម។
លោក សេក សុខុម ប្រធានមន្ទីរព័ត៌មានខេត្តបន្ទាយមានជ័យ មានប្រសាសន៍ថា
កម្ពស់ទឹកមិនទាន់ដល់កម្រិតគ្រោះថ្នាក់ទេ ប៉ុន្តែលោកបានបន្ថែមថា វាលស្រែ និងប្រឡាយមានទឹកពេញ។
លោក យ៉ុង គឹមហ៊ាន អភិបាលរងខេត្តព្រះវិហារបានមានប្រសាសន៍ថា កម្ពស់ទឹកបានស្រកក្នុងខេត្តហើយ ហើយប្រជាពលរដ្ឋចំនួនប្រាំបួនគ្រួសារកំពុងបន្តស្នាក់នៅក្នុងជម្រកបណ្តោះអាសន្ន។
- Tags :
- ទឹកជំនន់
