ឯកឧត្តម ស្វាយ សំអ៊ាង ចុះពិនិត្យហេដ្ឋារចនាសម្ព័ន្ធផ្លូវថ្នល់ ដែលខូចខាតដោយជំនន់ទឹកភ្លៀង ដើម្បីត្រៀមជួសជុលឡើងវិញ សម្រួលការធ្វើដំណើររបស់ពលរដ្ឋ
ភ្នំពេញ៖យោងតាមប្រភពព័ត៌មានពីរដ្ឋបាលខេត្តស្ទឹងត្រែង ឯកឧត្តម ស្វាយ សំអ៊ាង អភិបាលនៃគណៈអភិបាលខេត្តស្ទឹងត្រែង បានដឹកនាំក្រុមការងារ អាជ្ញាធរដែនដី មន្ទីរអង្គភាពដែលពាក់ព័ន្ធ និងកងកម្លាំង ចុះពិនិត្យហេដ្ឋារចនាសម្ព័ន្ធនានា ពិសេសផ្លូវថ្នល់ ដែលរងការខូចខាតដោយជំនន់ទឹកភ្លៀងដើម្បីរកវិធានការ រកដំណោះស្រាយ ជួសជុល សម្រួលឡើងវិញ សម្រាប់ការធ្វើដំណើររបស់ប្រជាពលរដ្ឋ នារសៀល ថៃ្ងអាទិត្យ ទី០៤ ខែកញ្ញា ឆ្នាំ២០២២ ម្សិលមិញនេះ។សូមបញ្ជាក់ថា ខេត្តស្ទឹងត្រែង ក្នុងរយៈពេលប៉ុន្មានថ្ងៃដើមខែកញ្ញានេះ បានរងផលប៉ះពាល់ដោយជំនន់ទឹកភ្លៀង បណ្តាលឱ្យភូមិ ស្រុក និងលំនៅដ្ឋានប្រជាពលរដ្ឋមួយចំនួន ពិសេសប្រជាពលរដ្ឋដែលរស់នៅស្ថិតនៅ ភូមិ ស្រែឬស្សី ឃុំស្រែឬស្សី ស្រុកថាឡាបរិវ៉ាត់ ខេត្តស្ទឹងត្រែង រងនូវការលិចលង់។ក្រោមការដឹកនាំរបស់ឯកឧត្តម ស្វាយ សំអ៊ាង គឺ ឯកឧត្តមបានចុះជាប្រចាំត្រួតពិនិត្យស្ថានភាពទឹកជំនន់នៅតំបន់រងគ្រោះខ្លាំងនិងតំបន់ផ្សេងៗទៀតក្នុងខេត្ត ដើម្បីត្រៀមលក្ខណៈសង្គ្រោះពលរដ្ឋឱ្យទាន់ពេលវេលា និយាយរួមស្ថានភាពទឹកជំនន់នៅខេត្តស្ទឹងត្រែង គឺអាចគ្រប់គ្រងបាន ដោយមិនបង្កគ្រោះថ្នាក់ដល់អាយុជីវិតប្រជាពលរដ្ឋឡើយ។
ក្រោយស្ថានភាពទឹកជំនន់មានការធូរស្រាល ឯកឧត្តម ស្វាយ សំអ៊ាង ក៏នៅតែបន្តដឹកនាំក្រុមការងារពិសេសដឹកនាំស្ថាប័ន មន្ទីរ អង្គភាព ជំនាញក្នុងខេត្តបន្តចុះពិនិត្យហេដ្ឋារចនាសម្ព័ន្ធនានានៅក្នុងខេត្ត ពិសេសផ្លូវគ្រាលគ្រោះក្រហម ក្នុងភូមិ ស្រែឬស្សី ស្រុកថាឡាបរិវ៉ាត់ ដែលរងការខូចខាតដោយជំនន់ទឹកភ្លៀង ដើម្បីមានវិធានការជួសជុល សម្រួលឡើងវិញ ដល់ការធ្វើដំណើររបស់ប្រជាពលរដ្ឋ ។
មានប្រសាសន៍ក្នុងឱកាសចុះត្រួតពិនិត្យ ជាក់ស្តែង ឯកឧត្តមអភិបាលខេត្ត បានណែនាំដល់មន្ទីរអភិវឌ្ឍន៍ជនបទខេត្ត ពិនិត្យសិក្សាដើម្បីរកវិធានការជួសជុលផ្លូវឡើងវិញ ដែលរងការបាក់ស្រុតដោយជំនន់ទឹកភ្លៀង និងហេដ្ឋារចនាសម្ព័ន្ធមួយចំនួនទៀតក្នុងតំបន់នេះ ផងដែរ។ឆ្លៀតក្នុងឱកាសនោះដែរ ឯកឧត្តម ស្វាយ សំអ៊ាង បានឧបត្ថម្ភជាថវិកាផ្ទាល់ខ្លួនរបស់ឯកឧត្តម ដល់បងប្អូនប្រជាពលរដ្ឋ ដែលជួយសម្រួលដល់ប្រជាពលរដ្ឋធ្វើតាមផ្លូវនេះ ក្នុងពេលដែរមានទឹកជំនន់ទឹកភ្លៀង ម្តងៗ៕
- Tags :
- ទឹកជំនន់