ស្ថានភាពជំនន់ទឹកភ្លៀងកំពុងហក់ឡេីងបង្កនូវការលិចលង់ លំនៅដ្ឋាន ភូមិករ របស់ប្រជាពលរដ្ឋនៅចំណុចព្រំដែនកម្ពុជា-ថៃ
តាមប្រភពព័ត៌មានរបស់ស្នងការដ្ឋាននគរបាលខេត្តបាត់ដំបងបានឱ្យដឹងថា ក្នុងស្ថានភាពដែលជំនន់ទឹកភ្លៀងកំពុងហក់ឡេីងបង្កនូវការលិចលង់ លំនៅដ្ឋាន ភូមិករ របស់ប្រជាពលរដ្ឋនៅចំណុចព្រំដែនកម្ពុជា-ថៃ ស្រុកសំពៅលូន ភ្នំព្រឹកនិងស្រុកកំរៀង កងកម្លាំងនគរបាលបានចូលរួមយ៉ាងសកម្មក្នុងការជួយសង្រ្គោះប្រជាពលរដ្ឋដែលទទួលរងគ្រោះដោយជំនន់ទឹកភ្លៀង ប្រភពខាងលើបានឱ្យដឹងថា ចាប់តាំងពីថ្ងៃទី៣រហូតដល់ថ្ងៃនេះថ្ងៃទី៤ខែតុលាឆ្នាំ២០២៣ លោកឧត្តមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង បានដាក់ចេញនូវបទបញ្ជាដល់ថ្នាក់ដឹកនាំបញ្ជាការវរសេនាតូចនគរបាលការពារព្រំដែនគោក អធិការនគរបាលស្រុកពាក់ព័ន្ធ ដឹកនាំកងកម្លាំងក្នុងអង្គភាពចូលរួមសហការជាមួយសមត្ថកិច្ច អាជ្ញាធរពាក់ព័ន្ធ ចេញអន្តរាគមន៍សង្រ្គោះប្រជាពលរដ្ឋ ដែលកំពុងទទួលរងគ្រោះដោយជំនន់ទឹកភ្លៀងទៅកាន់ទីទួលសុវត្ថិភាព ។ ប្រភពខាងលើបញ្ជាក់ថា ជាក់ស្តែងកម្លាំងនគរបាលស្រុកសំពៅលូន ស្រុកភ្នំព្រឹក ស្រុកកំរៀង និងកម្លាំងនគរបាលវរសេនាតូចការពារព្រំដែនគោកលេខ៨១៧និង៨១៩បានចុះផ្ទាល់ក្នុងសកម្មភាពនេះដេីម្បីចូលរួមយ៉ាងសកម្មផុលផុស ដឹកជញ្ជូនប្រជាពលរដ្ឋ ទ្រព្យសម្បត្តិទៅកាន់ ទីទួលសុវត្ថុភាពរួមទាំងសត្វពាហនៈផ្សេងទៀតផងដែរ៕(ប្រភព៖ស្នងការដ្ឋាននគរបាលខេត្តបាត់ដំបង)