សមត្ថកិច្ចសាខា ក.ប.ប. បន្តយុទ្ធនាការអប់រំផ្សព្វផ្សាយអំពីសុវត្ថិភាពម្ហូបអាហារ ដល់សិស្សានុសិស្សនិងលោកគ្រូអ្នកគ្រូ
ដោយអនុវត្តតាមការចង្អុលបង្ហាញរបស់ថ្នាក់ដឹកនាំនៃអគ្គនាយកដ្ឋាន ក.ប.ប. និងអនុវត្តភារកិច្ចរបស់ខ្លួនក្នុងវិស័យសុវត្ថិភាពម្ហូបអាហារ នៅថ្ងៃទី១២ ខែកក្កដា ឆ្នាំ២០២៣ សមត្ថកិច្ច ក.ប.ប. ប្រចាំនៅសាខា ក.ប.ប. ខេត្តកំពង់ស្ពឺ ខេត្តមណ្ឌលគិរី និងខេត្តកំពត សហការជាមួយអាជ្ញាធរដែនដី និងលោកគ្រូ-អ្នកគ្រូ នៃអនុវិទ្យាល័យឆាយធុប ក្រុងច្បារមន ខេត្តកំពង់ស្ពឺ វិទ្យាល័យសេកតាកោង ក្រុងកំពត ខេត្តកំពត និងអនុវិទ្យាល័យមនោរម្យ ក្រុងសែនមនោរម្យ ខេត្តមណ្ឌលគិរី បានបើកកម្មវិធីអប់រំផ្សព្វផ្សាយអំពីសុវត្ថិភាពម្ហូបអាហារដល់លោកគ្រូ អ្នកគ្រូ និងសិស្សានុសិស្ស សរុបចំនួន ១,២៣០នាក់។
នៅក្នុងកម្មវិធីអប់រំផ្សព្វផ្សាយនេះ លោកប្រធានសាខា ក.ប.ប. ខេត្តទាំងបីខាងលើ និងមន្ត្រីសាខាដែលជាគ្រូបង្គោលបានធ្វើការពន្យល់យ៉ាងក្បោះក្បាយអំពីតួនាទីភារកិច្ចរបស់អគ្គនាយកដ្ឋាន ក.ប.ប. ក្នុងកិច្ចការពារអ្នកប្រើប្រាស់ និងសុវត្ថិភាពចំណីអាហារ អនុលោមតាមច្បាប់ទាំង៤ដែលអគ្គនាយកដ្ឋាន ក.ប.ប. ទទួលអាណត្តិអនុវត្ត ដល់អ្នកចូលរួមទាំងអស់។ ក្នុងវេទិកានេះផងដែរ ក៏មានការផ្លាស់ប្តូរនូវសំណួរនិងចម្លើយទៅវិញទៅមករវាងសិស្សានុសិស្ស និងគ្រូបង្គោល ដែលធ្វើឱ្យកម្មវិធីកាន់តែមានភាពផុលផុស។
កម្មវិធីអប់រំផ្សព្វផ្សាយនេះនឹងរួមចំណែកលើកកម្ពស់ការយល់ដឹងរបស់សិស្សានុសិស្សដែលជាទំពាំងស្នងឬស្សីទាក់ទងនឹងច្បាប់និងបទបញ្ញត្តិនានា ជាពិសេសការជ្រើសរើសម្ហូបអាហារដែលមានសុវត្ថិភាពមុននឹងយកទៅបរិភោគ។
