មន្រ្តីជាន់ខ្ពស់សិង្ហបុរីកោតសរសើរ សម្តេចតេជោ រៀបចំព្រឹត្តិការណ៍ស៊ីហ្គេមយ៉ាងអស្ចារ្យ
លោក ធាវ ឈីហាន (Teo Chee Hean) ទេសរដ្ឋមន្ដ្រី រដ្ឋមន្ដ្រីសម្រប សម្រួល សន្ដិសុខ ជាតិ សិង្ហបុរី បានបង្ហាញការកោតសរសើរ ចំពោះការរៀបចំព្រឹត្តិ ការណ៍ស៊ីហ្គេមនៅកម្ពុជា។ លោក ចាត់ទុកការរៀបចំនេះបានល្អប្រសើរ និងអស្ចារ្យ បំផុត។ លោក ធាវ ឈីហាន បានថ្លែងកោតសរសើរការរៀបចំព្រឹត្តិការណ៍ប្រកួតស៊ីហ្គេមនេះ ក្នុងឱកាសអញ្ជើញជួបសម្តែងការគួរសម និងពិភាក្សាការងារ ជាមួយសម្តេចតេជោ នៅវិមានសន្តិភាព នាព្រឹកថ្ងៃទី០៨ ខែឧសភា ឆ្នាំ២០២៣ ។ លោក អ៊ាង សុផល្លែត ជំនួយការផ្ទាល់សម្ដេចតេជោ បានបញ្ជាក់បែបនេះ « ឯកឧត្តម ធាវ ឈីហាន បានគោរពសម្ដែងការអបអរ សាទរ ចំពោះសម្ដេចតេជោ ដែលបានរៀបចំព្រឹត្តិការណ៍ស៊ីហ្គេម បានយ៉ាងអស្ចារ្យ និងជោគជ័យ»។ លោក ធាវ ឈីហាន បានបន្តថា កីឡា ករ កីឡាការិនី បានមកចូលរួមប្រកួតនេះ ទទួលបានការរីករាយ ដោយទទួលបានការទទួលបដិសណ្ឋារកិច្ចយ៉ាងកក់ក្តៅ។
ក្នុងជំនួបនេះ លោក ធាវ ឈីហាន បានសំដែងការអបអរចំពោះសម្ដេចតេជោ ចំ ពោះការប្រយុទ្ធប្រឆាំងជំងឺកូវីដ១៩ បានជោគជ័យ និងការដឹកនាំកិច្ចប្រជុំកំពូល អាស៊ាន និងកិច្ចប្រជុំកំពូលពាក់ព័ន្ធប្រកបដោយជោគជ័យ។ លោក ធាវ ឈីហាន បានជម្រាបសម្ដេចតេជោ អំពីដំណើរទស្សនកិច្ចរបស់ លោក មកកាន់កម្ពុជាពេលនេះ គឺដើម្បីជំរុញទំនាក់ទំនងរវាងប្រ ទេសទាំងពីរឱ្យ ឈាន ឡើង មួយកម្រិតទៀត។ សម្ដេចតេជោ ហ៊ុន សែន បានថ្លែងអំណរគុណចំពោះរដ្ឋាភិបាល និងប្រជាជនសិង្ហ បុរី ដែលបានបញ្ជូនកីឡាករកីឡាការិនីមកចូលរួមប្រកួត កីឡាស៊ីហ្គេម នៅកម្ពុជា ដែលបានធ្វើឱ្យព្រឹត្តិការណ៍ប្រកួតកីឡាស៊ីហ្គេមនៅកម្ពុជា កាន់តែមានភាព ឱឡារិក ថែមទៀត។ សម្តេចតេជោ ក៏បានថ្លែងអំណរគុណរដ្ឋាភិបាលសិង្ហបុរី ដែលបានគាំទ្រកម្ពុជា ក្នុង ពេលកម្ពុជាដឹកនាំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ។ ពាក់ពន្ធការជំរុញទំនាក់ទំនងរវាងប្រទេសទាំងពីរ ឱ្យឈាន ឡើងមួយកម្រិត ទៀត នោះ សម្ដេចតេជោ បានវាយតម្លៃខ្ពស់ចំពោះកិច្ចប្រតិបត្តិ ដែលមានស្រាប់រវាង ប្រទេស ទាំងពីរ ហើយលើកទឹកចិត្តឱ្យភាគីទាំងពីរ ពិនិត្យមើលការជំរុញការអនុវត្ត លើកិច្ចព្រមព្រៀងអនុស្សាណៈ ដែលបានចុះហត្ថលេខារួចហើយ ជាពិសេសលើ វិស័យ ថាមពល និងវិស័យទីផ្សារកំបោនជាមួយគ្នា។ សម្តេចតេជោនាយករដ្ឋមន្ត្រី ក៏បានលើកទឹកចិត្តឱ្យពិនិត្យលទ្ធភាពលើកិច្ច សហ ប្រតិ បត្តិការក្នុងវិស័យដទៃទៀត ដែលអាចធ្វើទៅបាន៕
