គ្រោះថ្នាក់ចរាចរណ៍ រវាងរថយន្ដ និងរថយន្ត ខ្ទេចទាំងពីរ នៅលើកំណាត់ផ្លូវជាតិលេខ4 ត្រង់ចំណុចភូមិព្រៃផ្ដៅ ឃុំត្រពាំងគង ស្រុកសំរោងទង
តាមប្រភពព័ត៌មានពីស្នងការដ្ឋាននគរបាលខេត្តកំពង់ស្ពឺ បានឱ្យដឹងថា នៅវេលាម៉ោង០០:៤០នាទី នាយប់ថ្ងៃទី៦ខែឧសភាឆ្នាំ២០២៣ នៅលើកំណាត់ផ្លូវជាតិលេខ4 (36-37) ត្រង់ចំណុចភូមិព្រៃផ្ដៅ ឃុំត្រពាំងគង ស្រុកសំរោងទង រថយន្ដ1គ្រឿងម៉ាក KIAMORNING ពណ៌ស ស្លាកលេខភ្នំពេញ 2AN-8704 អ្នកបើកបរឈ្មោះ យឹម ពិសិដ្ឋ ប្រុស អាយុ35ឆ្នាំនៅភូមិចំការកួយ ឃុំព្រៃពួច ស្រុកអង្គស្នួល ខេត្តកណ្ដាល បើកបរពីទិសខាងលិចទៅទិសខាងកើត លុះមកដល់ចំណុចខាងលើបាន បានប៉ះជាមួយរថយន្ដ1គ្រឿងម៉ាក CHENG LONG ពណ៌ស ពាក់ស្លាកលេខភ្នំពេញ 3E-4903 សណ្ដោងសឺមីរ៉ឺម៉ក ពាក់ស្លាកលេខភ្នំពេញ 4A-5274 អ្នកបើកបរមិនស្គាល់អត្ដសញ្ញាណ គេចខ្លួនក្រោយពេលកើតហេតុ ។ ក្នុងហេតុការណ៍ខាងលេី សមត្ថកិច្ចនគរបាលបានឱ្យដឹងថារថយន្ដទាំង០២គ្រឿងបេីកបរក្នុងទិសដៅបញ្រ្ចាសគ្នាដោយសារតែរថយន្ដ KIAMORNING ជាប្រភេទរថយន្ដតូច កំលាំងបុកបានបណ្ដាលឱ្យខ្ទេចរងការខូចខាតខ្លាំងជាងរថយន្ដ CHENG LONG ដែលជារថយន្ដដឹកប្រេងឥន្ធនៈក្រុមហ៊ុន PTT អ្នកបេីកបររថយន្ដ KIAMORNING រងរបួសជាទម្ងន់ ។ បច្ចុប្បន្នសមត្ថកិច្ចនគរបាលបានយករថយន្ដទាំង០២គ្រឿងយកមករក្សាទុកបណ្ដោះអាសន្ននៅអធិការដ្ឋាននគរបាលស្រុកសំរោងទង ដេីម្បីកសាងសំណុំរឿង ចំណាត់ការនីតិវិធីបន្ដ៕
